冇獎問題：孫明揚同石禮謙，除咗大家都係搞地產房屋呢一瓣之外，兩人重有乜嘢關係？嗱，唔好咁心邪，一諗就諗官商勾結、政治交易，佢哋兩個細個時係街坊，一齊玩啫。話說幾十年前，喺灣仔堅尼地道同胡忠大廈（當時梗係未有胡忠大廈）中間，有一條短街，叫做鳳凰台。
議事堂傾西九招標
孫明揚同石禮謙屋企都係住喺度；鳳凰台上有一片空地，啲小朋友成日喺度跳飛機、跳繩、打籃球，至於佢兩個有冇打過交，八方就唔知。後來孫明揚入咗港大，石禮謙去咗澳洲讀書，一個從政，一個從商，估唔到幾十年後，孫公做咗房屋及規劃地政局局長，石禮謙則循地產建造界功能組別選入立法會做議員，大家喺議事堂上講酒店房間夠唔夠，辯論西九應唔應該單一招標……港台拍過《獅子山下》，可以諗諗拍番套《鳳凰台上》。
講完掌故，講番政情。喺現有局長之中，孫公資歷最深，○七年換屆，煲呔如果再連任，肥佬許未必肯捱義氣，咁政務司司長個位，邊個坐呢？孫公當然夠資格啦，但佢似乎想退休多啲，畢竟六十過外，享吓福好過。煲呔嫡系之中，曾俊華最有實力，但如果唐英年唔撈，曾俊華由工商局升任財政司，重複唐唐當年條路，亦順理成章，比做政務司更有策略作用。咁呢個位，一係畀棄帥換車嘅李國章，若然外聘高手，咁就好睇囉。
傳真︰2623-9278
電郵︰[email protected]