個市前日雷電交加，昨日仍然落雨，恒指再跌109點。跌幅逾20%嘅C輪，超過50隻。市況波動，盪來盪去，1個鐘頭之前閉翳，半個鐘頭之後富貴，跟住15分鐘又再閉翳。1粒子彈在手者，不宜炒輪。5粒子彈在手者，亦不宜5粒子彈1鋪射晒出去。
中銀C輪4644：股票或窩輪嘅波幅，係指即日最高價同最低價相比嘅百分率。是日波幅最大嘅窩輪，係中銀C輪3642，最高11仙，最低3仙，波幅3.7倍，收4.8仙，大散54%。中銀（2388）收15.70元，跌25仙。
3642剩番10個交易日買賣，行使價16.88元。正股要升1.20元以上，隻輪先有剩餘價值。隻輪昨日成交56萬元，睇嚟呢啲錢凍過雪水。博中銀反彈，4644穩陣好多。
和黃P輪4764：第2大波幅嘅窩輪係和黃P輪4764，最高3仙，最低1.9仙，波幅1.6倍，收2.9仙，單日升幅164%，有人掟19萬銀落去玩死亡遊戲。
話買4764係玩死亡遊戲，大概冇乜錯。隻輪11月上旬夠鐘，行使價68元。正股（013）𠵱家78.15元，望正股跌10.20元，唔多實際。當然，買4764嘅會話，輸晒都係三兩個仙。如果睇淡和黃，買P輪，正路之選係9134，明年1月至夠鐘。不過，最好C輪與P輪都唔做住。買C輪，驚正股因為相對仍高有下跌空間。買P輪，又驚大冧把口手並用挾淡倉。呢排大冧把講嘢好狼，唔知邊句係真心話，邊句係出口術。唔賭和黃輪，冇錢贏，但唔會輸。
章盛