停牌成年幾，剛復牌無幾日的東成控股（735），股價日日係咁升，完全無視大市下跌，昨日又升35.8％，收0.33元。細價股之中，佢都真係算好熱鬧。
雖然傳聞話公司有一系列動作跟尾，但就算消息好正斗，隻股都冇理由在短短5日內升1.55倍咁多，睇嚟炒家水頭幾充足。噚日臨收市時，買盤係咁掃上，令隻股以接近全日最高位收市。
經紀陳話，東成搞緊10供3，每股0.10元的供股計劃，家陣股價升得咁厲害，班小股東好大機會肯參與。
另外，前稱興旺行，剛剛改咗名叫真樂發（1003）嘅股仔，昨日逆市上升12.38％，收0.118元，成交股數有1.12億股，金額1279萬元。
真樂發急升傳批股
經紀陳話，隻股自從控股權易手後，家陣已經重組完成，兼且轉型做玩具製造。
由於隻股由幾個仙炒上嚟，江湖有傳聞話可能批股集資。
慕容小初