上星期上映的《妖怪大戰爭》，重有兩、三套鬼片跟住上，本本旅遊周刊都教大家如何過個心寒的暑假。而喺商店街的一個角落，都突然多咗個嚇鬼鬼屋，以大正時代古美術商人家的血殺案做主題嚇鬼你。企喺出口，往往聽住四、五個男男女女的尖叫聲自遠而近，然後一仆一碌的跑出鬼屋，真係咁堅？小記硬住頭皮都要試試。
記者：陳慧敏
唔聲唔聲嚇你一驚
小記開頭真係好鬼驚，但可能期望過高做足心理準備，鬼屋10米的單行道上，黑漆漆乜都無，怪叫、紙公仔，機關模式人人估到。轉角處，天花板跌下來的紙紮公仔已經撻到「面目模糊」。前面房仔一眼睇晒，睇怕地下隻女鬼會企起身，出口有第二隻鬼伏擊咁囉，你嚇我唔到嘅！施施然行過，突然兩邊暗門齊開，不知3、4隻係人係鬼定公仔的妖怪前後伏擊撲出，「嘩！」這一叫發自丹田，雄渾有勁，「啪」一聲惡靈又退晒返入去，真係估佢唔到。結果我與同行美紀又喊又叫，笑住咁衝到出口，7分嚇親3分遮醜咁啦。見到門口幾位美少女拉拉扯扯猶疑不決，睇怕應該俾我哋嚇親。
怨靈人形屋敷
位置：商店街6樓
票價：?500
需時：約4分鐘
現實世界搵嘢食
剛才講過道頓堀唔怕無好嘢食，坐時光機（搭𨋢）落番大街，係時候食正餐。除咗墨魚丸，嚟大阪重必食串燒同雜錦燒，想再體驗地道風情，還可試試自己落手落腳整㖭。
兩份食8cm墨魚丸
商店街後面過條河，就是去年3月開幕的特賣店Donki，其77.4米高的垂直型摩天輪最好認，地下還有家墨魚丸店，墨魚丸統統8cm大，一個已經夠飽。
Donki
地址：大阪市中央區宗右衛門町7-13Donki地下。
電話：（81）647081411
可愛迷你串燒
放題式串燒，夏日期間推出迷你串燒。種類30種雖不算多，但除了基本的魚呀、魚蛋之外，還有燒魚餅、餃子、菠蘿、南瓜等特別一點的選擇，還有自家製的醬汁8種咁多，夏日期間營業時間都係去到11點。
串家物語
地址：大阪市道頓堀1-7-15,9樓
電話：（81）662145494
放題收費：?2,625一位
最多配料雜錦燒
道頓堀與橫街千日前裏都有很多雜錦燒店，其中以千日前這家的雜錦燒配料最多，紅蘿蔔、玉子、昆布等起碼9種配料，將配料全部攪勻，放在鐵板上燒即可，而且不會食到一口粉醬。營業至夜晚11點，啱晒夜鬼！
