近排香港天氣十分唔穩定，連日大雨都未停過，但就冇影響到賭王千金何超瓊蒲吧嘅雅興，噚日凌晨佢喺一名外籍男伴嘅陪伴下，約埋陳鴻業同女友鄭詩韻以及一名女伴，一行五人到中環嘅Dragoni蒲吧，到凌晨四點鐘先至捨得離場。
西裝褸擋雨
噚日凌晨近四點，超瓊同外籍男伴等五人一齊離開酒吧，外面落緊雨，但唔知係超瓊熱情抑或飲多兩杯，佢同同行女伴未理雨絲洗禮，重企喺街頭緊緊擁抱，一攬就攬咗成半分鐘，外籍男士見狀即刻攞出西裝褸為兩位女士擋雨，反而自己就淋到濕晒，的確有紳士風度。
陳鴻業駕車
之後女伴上咗陳鴻業架保時捷跑車後座，陳鴻業就忙於執拾車廂雜物，騰出空位畀朋友坐，喺呢個時候，超瓊就同外籍男士嚟個goodbyekiss，大家咀嘴後，超瓊至依依不捨咁上車，但因車廂較細，上車時就較為狼狽，不過嗰位有紳士風度嘅外籍男士就冇上車，由陳鴻業負責做柴可夫，接送三名女士返屋企。
