爆機狂迷：XBOX版玩靚畫質同恐怖分子打巷戰

以第一身射擊為玩法嘅遊戲有好多，不過講到最深入民心嘅就必定要數到《Rainbow6》系列，《Rainbow6》一向以石屎森林嘅城市巷戰為戰場，戰鬥打法多變亦是出名原因之一；最新一集《RainbowSix：Lockdown》將會於9月見街，今集就要應付𠵱家最多人談論嘅恐怖分子，面對隨時發生嘅生化危機！預訂XBOX版更會附送迷彩通訊器，配合上Live!網上對戰同戰友通訊就最有現場感！
記者：許福合

《Rainbow6》之所以受到唔少玩家歡迎，主要原因在於遊戲環境貼近現實，主要場景都在城巿進行，城巿戰比其他環境變化更多，更具挑戰性，淨係怕有人喺高處向你放冷槍已經夠緊張，加埋今集大玩生化危機，更添驚嚇氣氛，比前作更襟玩。

XBOX基版開發

遊戲一開始時，可以有好多唔同嘅設定，淨係場景已經多達14個，不過需要玩家先過版至可以選擇，而且從官方發布資料顯示，遊戲關卡總數多達16個，相信還有隱藏版圖，而場景設計更多元化，由英國、法國到南非都有，各個場景都有唔同特色。
今集特別之處在於強化咗故事嘅發展同連貫，同以往做任務過版唔同，所以提議各位要真正享受遊戲，不妨連CG汁都撈埋，將更能了解故事發展；而事實上，此作動畫部份都製作得相當唔錯，加上《Lockdown》原來係以XBOX基版開發，XBOX版畫面效果相信比PC及PS2版來得更出色。除此之外，玩得爽快更值得一提，基本上除咗一開始需要Loading外，整個版圖都唔使有任何阻礙玩家嘅Loading動作，喜歡一鼓作氣打個痛快嘅玩家，相信就最開心。

■場景會出現變化，更有機會要喺雨天作戰。

■出動夜視鏡，暗黑環境都無有怕。

■觀察環鏡，摸清敵人位置先出動，可減少傷亡。

開住聲聽指揮

雖然《RainbowSix》係第一身射擊遊戲，不過並唔代表玩家就要一人作戰，遊戲內玩家可以化身成為小隊長，帶領隊員完成任務，今集隊伍控制比較易上手，同系列就曾經出現要控制兩組小隊嘅情況，玩家要兩面兼顧實在有點難度，而今集玩家嘅隊友明顯AI強得多，大部份時間都可跑到合適位置殺敵，有幾次筆者重係靠隊友相救先可保小命，有時還未發現敵人位置，已經被隊友解決，所以今集玩家嘅角色，將可以放多啲喺指揮上，掌握戰陣的布局同小隊移動位置等。
另外提提大家，打機時謹記要開住聲嚟玩，除咗可以聽到大量現場聲效，如敵人通話聲、人質叫聲，甚至行過地板時嘅聲音，而且最正係每個隊友都會出聲提示，例如咩位置出現敵人、前面有危險又或已經清場等，可以玩得份外過癮！想轉吓口味，可以改為擔當狙擊手，喺遠處放冷槍，享受一擊即中嘅爽快。

■駁火場面，相信係好多玩家嘅至愛。

■間中亦要以爆破方式找出路。

■部份出入口唔可以用武力，要用腦先可通過。

■隔住窗都唔驚，一於照打。

配備防生化裝備

今集講到要應付生化危機，自然係配合「非常規」嘅武器，其中最好用就要數到防生化裝備，可以進入受感染地區作戰，另一個可探測牆壁後面人物行動嘅偵測器，重好用過一般遊戲所使用嘅雷達地圖，用咗之後可預先知道敵人位置，無咁容易被人伏擊。
《Lockdown》內有好多唔同裝備可以選擇，不過係唔可以全部一次拎晒上身，出戰時，就可以選擇武器嘅配搭，最基本當然係重型武器配手槍，再落嚟就係拎多幾個手榴彈，不過XBOX版預設會用L掣掉手榴彈，筆者就幾次因為按錯炸死自己人，奉勸各位要多加小心！《Lockdown》XBOX版重會加入一個升級模式，玩家可創造隊員，並且可以選擇性別，喺多人模式中，可以有機會獲得新武器，甚至提升能力值，透過XBOX嘅Live!與人作戰時，就能利用「進化」優勢去應付敵人。

■換上重裝武器，可以「橫掃」敵人。

■出動熱能感應器，敵人無所遁形。

■敵人火力好強，更會有直升機支援。

主機：XBOX
開發：Ubisoft
類型：射擊
遊戲人數：1-2人
推出日期：9月6日
XBOX（800964215）

■預訂XBOX版Lockdown可以獲得迷彩通訊器。