10秒，限你10秒內指出相片內3隻真正的聖斑納犬都咪話唔難，事實上這幅相苦了攝影師，足足拍了20分鐘，皆因三姊弟Sheila、Minnie與Mickey最討厭與牠們長相相似的毛公仔，一見主人攬起毛公仔就呷醋耷耳，好彩事後有雪糕做獎勵，三姊弟先回復醒神活潑扎扎跳咋！
記者：鄺天樂
攝影：陳陶鈞
三佬Mickey最得意
狗主Edmen與Lanly大歎幾經周旋方抱到Mickey歸：「一心上網買聖斑納犬，點知澳洲狗場諸多留難，估唔到買隻狗都咁多波折。」皆因東南亞人在外國寵物界臭名遠播，特別是「唔理有無腳落地，背脊向天皆可食」的中國人，數之不盡的蒸煮燜燉焗狗案例嚇怕大部份狗場主人，寧願有錢不賺誓保狗隻安全：「我哋要Send屋企環境相畀狗場主人睇，又要解釋喺香港食狗肉屬犯法行為，幾經辛苦先帶到Mickey返屋企。」
大家姐SheilaEQ高
Mickey之所以來港，全因由細和大家姐Sheila玩到大的大阿哥大雄不幸過身，Edmen：「大雄一死Sheila即時情緒低落，買咗隻Minnie返嚟陪佢，不過Minnie太曳，所以再買多咗隻囝囝Mickey。」大家姐在香港很出名，因牠是狗醫生兼狗教授，每隔一段時間就要出更探望老人家、長期病患者或與大班小朋友做朋友仔，Lanly：「佢脾氣極好，小朋友見到狗就一定嘰哩呱啦大聲叫，但佢從未吠過一聲嚇親小朋友，EQ同脾氣分分鐘比人重好。」
二妹Minnie勁曳曳
Minnie討盡全家人狗歡心，一屁股坐落Sheila個頭Sheila都無詐型，與Mickey一樣玩到糖黐豆，Edmen解釋：「可能兩隻細狗年紀差唔多，只相差個半月大，所以玩得特別投契囉。」不過很奇怪，三姊弟都極不喜與牠們長相9成似的聖斑納犬毛公仔，Lanly：「一見到我攬住毛公仔就耷晒耳，可能呷醋啩？」上面那張真假狗排排坐的照片，花20分鐘才成功拍攝，因三姊妹一見毛公仔，即閃！
三姊弟情未了
雪糕做消夜
三姊弟生活好有規律，早上7時齊齊起身吃早餐，晚上10時齊齊瞓覺覺，二妹與三佬正值發育期，每日吃4餐，大家姐是成年犬，每日2餐就飽飽。Lanly每晚都會帶愛犬出街散步：「初初Minnie同Mickey都唔願周圍走㗎，要Sheila帶住先肯出街，𠵱家熟晒地頭，一聽到開門聲就扎扎跳。」出街，Lanly必備藤條：「一唔聽話就藤條燜『狗』肉！」乖的話，即獎雪糕做消夜，除朱古力味外，甚麼味道的雪糕三姊弟也吃得舔舔脷，雪糕對三姊弟來說除了是獎賞，還有另一意義：「食完就係時候要乖乖瞓覺喇！」
