超人李嘉誠兩個仔冇有怕，噚日係農曆七月十四中國鬼節，小超李澤鉅公布長江基建業績，小小超李澤楷就公布電訊盈科業績。不過，千祈唔好話唔信「邪」，皆因港股噚日開市冇耐就跌成百點，晏晝更加好似食咗瀉藥咁，狂瀉二百幾點。股票經紀周圍問人發生乜事，原來市場竟然傳出李超人重病入院嘅驚人消息。
「啱啱同佢食完晏」
咁人年紀大梗係要入院修理吓，不過，李超人叫得做Superman，就應該好打得，唔會好似常人咁易要入廠嘅。
超人入院消息一傳開，未知真假，已經令港股噚日嘅市值一日蒸發咗一千四百億元，真係唔講得笑。收市後，小超親身公布長建業績，記者行家當然要問清楚佢老竇李超人嘅健康情況，李澤鉅話：「傳聞唔好信呀，信就賣早咗股票喇，李生好健康，我啱啱同佢食完晏。市場成日都聽到唔同嘅消息，唔好信呀！」鉅少咁講，好明顯超人冇沽到佢手持嘅和黃同長實。
既然問得大仔小超，八方當然唔會錯過機會問埋細仔小小超啦，點知佢一如以往，又冇出席業績記者會，大家只好問電盈副主席蘇澤光，佢老哥只係回應咗三個字，就係「冇聽過。」至於澤楷人在何方，佢就只係擰擰頭。
舊年八月到今年初，李嘉誠已三十次增持和黃，用前日個收市價計，呢批股票令誠哥帳面賺咗成七億三千幾萬元。除咗和黃，超人今年中曾經七次增持長實，同樣用前日個收市價計，帳面亦賺成一億八千萬，所以都唔知係咪有人眼紅誠哥賺得多，專登喺正七月十四咒誠哥「入廠」，搞到股市大跌，單係噚日，超人已經賺少成億，可算係大整蠱。
傳真︰2623-9278
電郵︰[email protected]