港股在持續上升個多月後，終於出現重頭式的轉向，恒指大跌逾300點，低收15148，成交亦大增到335億元。重頭式的下跌，跌幅會比正常的調整為大，恒指初步支持位係14700。
國企走勢一樣，國指低收5300，大跌158點，初步支持位係4900。
基金同大行今次推高個市，成功在高位大舉派發窩輪，甚至連大高水的C輪亦派出唔少，除非佢哋未夠喉，想派多轉，否則佢哋肯定會出盡辦法，盡量㩒低個市，目的只有一個，就係低價補番倉。原本預期9月才會出現的調整市，有機會提早來臨，所有大藍籌股，唔係單日轉向，就係穿晒位，除個別有消息或業績特別利好者外，暫時唔使睇。
國企情況相若，近期升得多嘅，跌得亦快，但有料嘅（包括可能會私有化又或業績靚靚者）就仍然有得炒作，就以噚日跟市回落嘅中國人壽（2628）為例，由於在本月29號派中期成績表，市場普遍預期其盈利會幾好，所以在宣布前後，其股價相對大市仍會有強勢表現。至於吉林化工（368）同第一拖拉機（038），在大跌市中重可以逆流而上，吉化收2.075元，升5仙，一拖最高搶上1.72元，收1.65元，升1仙。
短期阻力在2.5元
大市調整，炒輪資金覓出路，好大機會流向二三線股。今個上升大浪，細價股冇點升過，只要有「水」到，炒番一頭半個月，唔係冇可能。事實上，家吓唔少二三線股PE低、息率又高，落後股一發力，升二三十個巴仙亦等閒。
濠賭股近日已作勢欲動，較強勢嘅係黃金集團（1031），噚日收2.375元，跌7.5仙，跟市調整。黃金集團由7月中的低位1.59元反彈，反覆升到2.65元才出現調整，形成上升三角形，暫時阻力係2.50元，一升破，就會再升過，目標指向3.50元。
黃金集團將澳門兩間酒店大翻新同擴充後，無論係酒店同賭場嘅收入都大幅上升，君怡酒店亦已定下周四（25日）有個鴻圖大展嘅慶典，賭枱由15張增至51張，貴賓廳數目亦由2個增至4個。
聽投資銀行界消息，黃金集團注入賭廳已密鑼緊鼓進行中，一間廳年賺數億元，注資一落實，又會再掀起濠賭股熱潮。
郭兆誠