噚日坊間有段消息話剛上市嘅香港《經濟日報》正籌備出一份以地產資訊為主嘅免費雜誌，最快本月底創刊，每逢周五派發。重話報館已經請晒人，又話會重點喺沙田同將軍澳呢啲新市鎮派，每期約派十萬份。
嘩，咁齊料，應該係堅料，點知八方問《經濟》中人，佢哋都話冇聽過，而由於負責同事陳老總正在放大假，所以無可奉告住，即係冇否認，亦冇證實。想知真相睇怕要等下周陳生回港。
咁八方梗係好想知究竟有幾真，因為多一本雜誌面世，就會請多啲人，可以幫吓唐唐手降低失業率。按政府噚日公布，失業率維持喺百分之五點七，冇上冇落，八方估，迪士尼開埋，個數應該可以減啲，但係暑假又多咗人搵工做，所以話，港英時期做到全民就業，唔係咁簡單。
傳真︰2623-9278
電郵︰[email protected]