林家棟日前到泰國宣傳電影《美麗酒吧》，提到片中飾演人妖的泰國和平小姐時，家棟表示最初不知對方是泰國和平小姐，更以為她是人妖而不敢走近，十分搞笑。
林家棟日前到泰國出席電影《美麗酒吧》一連串宣傳活動，這部由泰國投資的電影，演員還有曾志偉、張智霖和范振鋒等。
戲中家棟飾演一名落難到泰國的香港蠱惑仔，而上屆泰國和平小姐NeuyNahataiLekumrung則飾演人妖，並與家棟發生感情。
講泰文脷打結
家棟表示戲中八成對白都是泰文，幸好電影公司在拍攝前已替他僱用一名繙譯，家棟說：「好彩我都有啲語言天份，平時去泰國旅行都學咗唔少泰文，但原來要講一句句完整嘅說話真係有難度，而且泰文嘅發音同廣東話差好遠，好難捉摸。所以拍每一場戲都要繙譯喺旁邊教路，我講到條脷都打結，好在拍攝好順利，我嘅泰文都進步唔少。」
問到家棟跟上屆泰國和平小姐合作的感受如何？他笑說：「最初唔知佢係泰國小姐，見佢飾演人妖，我重以為佢真係人妖，因為泰國好多人妖都靚，見到佢之後，都唔敢太接近。我重問導演，呢個人妖真係好靚喎，導演先話佢係泰國小姐，我咪知自己搞錯囉。」家棟更大讚NeuyNahataiLekumrung為人隨和友善，NeuyNahataiLekumrung亦謙稱自己其實不漂亮，還表示泰國很多人妖比她更好看。
飲最正冬蔭功
家棟此行更獲當地的朋友邀請，到一家泰王御膳總廚所開的餐廳品嘗正宗泰菜，家棟說：「呢間餐廳啲布置已經好特別，好舒服。嗰度嘅冬蔭功湯係我所飲過最好味嘅冬蔭功，簡直喺世界第一，我一口氣飲咗三大碗，嗰種味道到𠵱家都念念不忘。」
