大市噚日下午急跌，市場即刻傳聞多多，傳得最厲害當然係超人抱恙，但市後又話係流料，雖然小初今鋪無乜損傷，但老友經紀陳就喊咁口，話呢排見啲窩輪熱炒，佢亦揸咗唔少，噚日跌市真係一鋪炒起晒。小初心諗，炒得窩輪，就要預咗唔係勁賺就係勁輸。
雖然昨日好多藍籌地產股一齊急跌，但部份地產股絲毫無損，老虎仔的遠東發展（035）就係其中之一，隻股昨日無起跌，收3.35元，成交股數915.9萬股，金額3044.7萬元。
經紀黃話，相比起其他二三線地產股，遠展呢一浪真係冇乜點升過，其中一個原因可能係佢同其他本地富豪在美國紐約塊地有訴訟，但其實呢幅地喺遠展的帳目中，只係以成本入帳，況且佢只係小股東，照計影響唔大。
遠展喺澳門的發展項目差唔多要動工，估計同威尼斯人集團的合作即將會落實，並簽訂正式協議，所以家陣股價企得咁硬，不妨望多兩眼。
慕容小初