填詞人黃偉文（Wyman）不知不覺入行十年，作品超逾九百首，本月他將會推出一隻紀念大碟，收錄他多年來的經典作品，而原來當年Wyman入行是軟硬天師一手提拔。
黃偉文由開始填詞至今已創作九百多首作品，為了紀念入行十周年這個大日子，Wyman即將推出一隻收錄了其著名作品大碟「WymanAfterTan」，當中包括有《你沒有好結果》、《活得比你好》、《好心分手》、《小玩意》以及《可惜我是水瓶座》等經典歌曲，而趙學而及劉美君亦分別翻唱了《最佳位置》及《大開眼戒》。
處女作《非常口》
原來Wyman的入行，是由當年的軟硬天師（即林海峰及葛民輝）一手促成的，他表示：「嗰時軟硬要出唱片，當時我哋大家都係同事，有一日佢哋話諗唔到啲歌詞，於是就叫我幫手寫兩句，之後寫吓寫吓軟硬就叫我不如幫佢哋寫一首歌，嗰一首就係《非常口》啦。」
提及這個無心插柳的入行經歷，Wyman笑言：「如果當晚我係約咗人食飯，冇留喺公司，軟硬就唔會叫我寫兩句，可能我嘅人生就會唔同晒。」
一直以來很多人都喜歡將Wyman與林夕作比較，Wyman表示覺得自己能夠與「詞神」相提並論十分開心，他說：「林夕係『詞神』，佢入行起碼比我早十年，既然咁多人要將我哋比較，我覺得開心嘅，因為呢個係對我嘅抬舉，好高興大家咁睇得起我。」
請槍手無稽之談
在訪問期間，Wyman忽然帶出一個話題，原來在這幾年間於網上不時流傳他與林夕一年能夠填這麼多詞，背後是因為二人有一個「林夕集團」以及「Wyman集團」，他笑笑地說：「呢件事都傳咗好幾年啦，成日都話我同林夕背後係有一班槍手去幫我哋，咁我哋先至可以一年有咁多作品。」對於這個無稽的傳言，Wyman只是淡淡然留下兩句話：「叫寫呢個傳聞嗰個人攞證據出嚟呀，我唔怕你㗎。」
採訪：李珮洳 攝影：葉君海
場地提供：Aluminium（CausewayBay）
