個市上晝跌76點，下晝雷電交加，散225點，全日埋單冇咗301點。C輪市場白骨纍纍，跌幅逾3成者有45隻。火頭有好多處，例如長和系忽然升變跌，且跌幅唔細；中銀（2388）晏晝派成績表後倒水咁倒；中移動（941）上演大插插。淨係中移動，已經拖低恒指85點。
中電信C輪4500：中移動跌3.8%，中電信（728）難兄難弟，跌3.9%。中電信近期升幅冇中移動咁大，跌勢應該輕過中移動，估計好快搵到支持，喺低位揀啲中電信C輪博反彈。
中電信C輪4500收34仙，1日唔見11.5仙，主角始終係呢件，交投最旺，買賣易，數據可接受。隻輪10月尾夠鐘，溢價1.5%，槓桿率9倍（有效7.7倍），引伸波幅24.7%。低位撈貨博反彈，乜嘢叫做低位，臨場執生。
中海油C輪3864：中海油（883）係第4大拖低恒指嘅成份股，跌20仙或3.5%。期油價格如果稍稍回升，中海油有機爬番高幾格，低位吼中海油C輪3864。
3864喺10月初夠鐘，輪價1元，昨跌21仙，價位跌幅重大過正股。負溢價0.4%，槓桿率5.5倍（有效5.5倍）。買呢隻唔使蝕溢價，交投唔多與爆炸力唔算大，則係缺點。
章盛