美國前華盛頓州州長駱家輝噚日話，國家主席胡錦濤下個月訪美時，會順道訪問華盛頓州，又話胡會喺西雅圖出席一次商界聚會以及參觀波音飛機公司。
白宮一直拒絕評論胡主席訪美啲消息，但係駱家輝就好少理，可能佢認為係件好榮幸嘅事啦。點都好，胡主席訪美即係程翔有機會甩身，因為過往都有前科，就係以釋放自己人「保外就醫」做見面禮。
程翔被指做台諜，指佢為中華歐亞基金會寫文章，洩漏國家機密，八方有位老友就笑話，香港好多傳媒人同學者都有同歐亞基金會接觸，大家當學術交流，咁講咪好得人驚？況且呢個基金會嘅董事長張京育（圖）係陸委會前主委，屬國民黨搞嘅機構，大陸每年都請佢去訪問，規格好高，𠵱家話佢係特務機構頭頭，真係訊息混亂。八方好奇，噚日想上基金會個網址www.fics.org.tw睇吓，點知閂咗上唔到，都唔知搞乜鬼。
傳真︰2623-9278
電郵︰[email protected]