二人女子組合Krusty成員張詠恩與活己嵐日前為新歌拍MV，大談自己學生時代趣事，二人更自誇當時是學校的風頭人物，裙下之臣眾多，其中活己嵐更有老師暗戀，認真有魅力。
新晉女子組合Krusty成員張詠恩（Jan）與活己嵐（Chucky）日前為新歌《MorningSir》拍攝MV，由於故事的題材是圍繞學生對老師的看法，故MV中亦找來一隻老虎仔當作「老師」，其間師兄麥浚龍更來探班，令二人開心不已。
整蠱老師為樂
二人在拍攝MV期間還大爆讀書時經常戲弄老師，阿Jan說：「記得讀中四嘅時候，有位竹升仔阿Sir嚟我間學校做實習老師，佢份人好怕醜，反而令我哋好想整蠱佢，例如我哋成日扮佢講唔鹹唔淡嘅廣東話，又成日扮佢撥頭髮嘅小動作。」
而Chucky則笑言讀書時曾被老師暗戀，她說：「有個英文阿Sir對我特別好，我每次英文測驗都畀我最高分，雖然我自問英文唔錯，不過我啲同學就話係佢暗戀我。不過我對中年男士冇興趣，所以我都冇表示，但我嘅英文就進步咗好多！」
裙下之臣眾多
當談到學生時代的感情生活，兩位成員又是滔滔不絕，她們更笑稱自己都是學校的風頭人物，阿Jan是運動健將，而Chucky則精於音樂和舞蹈，裙下之臣眾多，但入行之後卻有所不同，二人異口同聲說：「入咗行之後，日日都要做嘢，連瞓都冇時間，感情上真係『風光不再』。」
