戴夢夢早前拍攝電影《千杯不醉》，她看見楊千嬅與吳彥祖拍攝分手戲時，千嬅竟「話嚟就嚟」喊到收唔到聲，令曾被導演爾冬陞指摘沒有讀劇本的夢夢大感折服，下定決心要做好準備才埋位，隨時Ready做「啤妹」！
戴夢夢在新片《千杯不醉》中，與楊千嬅及梁靖琪（Toby）等飾演啤酒妹。向有「小千嬅」之稱的夢夢與千嬅初結片緣，自言獲益不淺，尤其佩服對方拍攝感情戲時演技收放自如。她說：「有場戲係講佢同吳彥祖分手，千嬅好傷心，不停咁喊，平日佢係大笑姑婆，但拍呢場戲時，佢先坐埋一邊培養情緒，唔出聲，到拍嘅時候即刻喊到收唔到聲，我覺得佢好得！拍完之後，佢話：『死啦，收唔到呀！』，我就話：『你啲眼線融晒、假眼睫毛甩晒，成個蘭桂坊怨婦咁呀！』，佢至識得笑番！」
爾冬陞為《千》片導演，夢夢稱對方做事很認真，拍攝期間她曾被導演責罵。她笑說：「有次佢問我：『你冇睇劇本㗎？』我話有，跟住佢又問Toby：『你做乜唔講嘢呀？』Toby話佢有講嘢，可能太細聲，所以聽唔到。其實呢啲都係誤會，人係有情緒嘅。」
第一時間埋位
夢夢又說：「有時佢（指爾冬陛）會攞住個大聲公，叫大家記住每個人都有自己嘅崗位，試戲都要認真，之後每逢埋位，我同千嬅、Toby都會擒擒青衝埋去，話畀導演聽：我哋係ready嘅！」
採訪：朱倬誼
攝影：仇志德
化妝：PollyDang
髮型：Morris@Orient4
服裝：SistyrMoon
場地：TwentyoneTwentyonebar