白手興家創立西餅王國嘅李曾超群，唔少人對佢做嘅西餅回味無窮，但佢最難忘嘅，卻係打日本仔時一塊「乾爭爭」嘅光酥餅。佢喺呢個星期六播出嘅亞視節目《三年零八個月》訪問時稱，香港淪陷時糧食短缺，有團體接濟災民，每人每日獲派一個光酥餅，李太笑稱當時正值發育時期，每日食一個光酥餅梗食唔飽，但都冇計，因為除咗食餅就冇其他嘢食。
抗戰時期唔少中國文化界人士滯留香港，為免佢哋俾日本仔所害，有關方面千方百計營救，漫畫家丁聰係其中一人，佢憶述當日走難經過猶有餘悸，而其中一名負責營救行動嘅主事人連貫，更同妻兒講要先救其他要人，自己家人則貴客自理，喺呢班幕後英雄策劃下，唔少名人安全撤退，包括港澳辦主任廖暉同佢母親何香凝，可以坐專船到海陸豐，反而連貫嘅細仔連環圖就喺走難時逝世，認真令人欷歔。
傳真︰2623-9278
電郵︰[email protected]