為獎勵會考狀元，有旅行社每年放榜後都會請佢哋暢遊台灣，行程最大賣點係有機會同台北市市長馬英九「小馬哥」見面，不過今年狀元旅行團就無緣獲小馬哥接見，改由市長辦公室主任鄭安國接待。鄭安國解釋小馬哥公務繁忙，噚早七點半開始，一直至半夜先結束工作，成日要開好多個會同審理好多議案，加上今日正式接任國民黨主席，要處理好多交接問題，故唔能夠見香港嘅狀元。
雖然小馬哥冇現身，但禮數做足，全團三十個學生每人獲送一張小馬哥簽名相同一支刻有馬家家訓「黃金非寶書為寶，萬事皆空善不空」嘅筆，學生則回贈一件簽上團友名字嘅T恤畀小馬哥留念。
學生見唔到小馬哥表現得大失所望，10A狀元阮家駿話，本來想問小馬哥點樣做一個親民領袖，可惜緣慳一面，令佢頗為失望；亦有學生話屋企人交帶要同小馬哥影合照回港，𠵱家唔能夠完成任務，非常惆悵。
傳真︰2623-9278
電郵︰[email protected]