二戰結束六十周年，日本首相小泉純一郎啱啱出嚟就日本侵略戰爭道歉，日本駐港總領事北村隆則當然要跟老細條line。佢噚日出席日本文化協會一項捐款儀式時，就猛講日本好有誠意改善中日關係，又話前排將日本侵華歷史刪去嘅團體唔代表日本政府，日本政府好正視侵華歷史。
不過，原本笑笑口嘅北村隆則一講到錢即刻變臉，被人問到幾時賠錢畀慰安婦同被殺嘅中國同胞，佢就話日本有個民間成立嘅基金，已經賠咗好多錢畀受害國家，申請人當中就冇中國人，而中國政府又冇提出索償名單，已經算數喎。
講番單捐款，主要係日本文化協會捐出一百萬，資助香港學生參與同日本文化交流有關嘅活動，噚日都有幾名受惠嘅學生代表出席儀式。
傳真︰2623-9278
電郵︰[email protected]