港股噚日低開高收，證明市底確係好強，大戶要造個市上去，任何不利因素都當佢冇到。
周二美股大跌，港股噚日早段應聲而跌，恒指落到15309，跌逾130點，但午後在大藍籌掃貨的帶動下，市勢由低位強力反彈，結果以全日高位15449收市，升5點，成交253億元。滙控（005）除息，期指收15422，低水收窄到27點。
大藍籌輪流發威，早段和黃（013）最勁，午後就由長實（001）、新地（016）同恒地（012）3隻大地產股接力。長實始終係大強勢，大行同大芬掃貨之勢如狼似虎，搶到上89.15元後回收88.70元，大升1.95元，再創出今個升浪的日中和收市新高。新地慢熱，臨近尾市時先急衝一段，收82.25元，升1.15元，亦係今浪新高；恒地收39.85元，升0.95元，略為落後。
和黃噚日嘅升勢，可以話係由頭帶到尾，收81.70元，大升1.60元，成交更逾2100萬股，總值17億元。推介嗰兩隻C輪，4897收0.91元，升21.3%，9130收0.64元，更大升23%。
經營情況改善
滙控一度落到127.40元，午後回升，高收128.10，升約0.30元，呢隻大落後股，遲早會收復失地。滙控C輪3821重有6個交易日玩，滙控若果呢幾日發力，3821起到足。今個升浪，隻隻大藍籌都起到七彩，滙控隨時會發威。
國企股個別發展，早輪推介過嘅哈爾濱動力（1133），宣布業績後升勢未停過，噚日衝上4.125元，再升3.1%，呢隻股票嘅貨源已落晒大戶手中，重有排上。
第一拖拉機（038）打出26日（下周五）宣布中期，股價有反應，收1.64元，升2仙。由今年3月中旬開始，一拖走勢形成大型複式頭肩底，近日升破1.63元的頸線，確認開展大升浪，完成後抽整固後，最小量度上升目標係2.10元。
04年度（12月年結），營業額42.46億元人民幣，但只獲利1196萬元人民幣，邊際利潤率只得0.28%，05年經營情況好好多，鋼材價格回落，銷售額又有雙位數增長，中期盈利會以倍計增長，有機會成為哈動第二。重有，一拖每股資產淨值2.54港元，股價折讓36%。
郭兆誠