八方噚日喺電視見到人氣又再度急升嘅立法會主席范徐麗泰（圖）接受現場直播訪問，主持人問起范太細個作文寫「我的志願」係乜，范太竟然話原來係想做貨櫃車司機，因為鍾意嗰種喺公路上自由自在嘅感覺，當然到佢大個咗，就知道要自由自在唔一定要做貨櫃車司機嘅。
范太曾經係港英政府年代栽培嘅精英之一，後來改投親中陣營，俾人話忽然愛國，但佢話，細個鍾意睇書，讀過一啲共產黨英雄故事，發覺原來呢個世界有一啲人好有理想，有自我犧牲精神，一度十分嚮往，點知俾老竇大鬧一餐；因為徐老先生係資本家出身，喺內地吃過共產黨苦頭，所以自此范太冇再沉迷，反而三、四十年後至再遇故知。
范太下個月六十歲生日，○八年會唔會再競逐連任呢？范太話要視乎身體狀況，今年初因為老公過身，心情好差，身體有啲唔好，但近來已經好番好多。
傳真︰2623-9278
電郵︰[email protected]