隔晚美股行雷，港股並冇閃電，皆因美股收市後惠普派靚靚成績表，一派之下，股價喺收市後時段，彈升7.3%，市場人士估計昨晚會帶起美股。其次，和黃（013）做定海神針，撐起個市。結果，短線炒家沽完貨後，又再買定離手，恒指由跌133點到埋單變升5點。
昨日計過，滙控（005）除息1.09元，扯低恒指39點。計埋呢個因素，恒指昨日實升45點。再計埋假如唔係中海油（883）拖低26點，恒指昨日實升71點。隔晚美股唔掂，當冇發生。
滙控C輪3843：滙控除息收128.10元，實際進帳0.29元。去年8月18日，滙控除息收117元，由此時起展開大升浪，到11月中升到136.50元。記唔記得4441與4445，就喺呢段日子由3毫幾升到個幾。恒指新高，冇理由剩低滙控滯後，今回可能行番去年舊路，升足幾個月，買定C輪等發財。
滙控C輪，搏殺嘅買短期貨，但要畀高啲溢價，都係推介先幾日推介嘅3843與9027，加多隻9026。
滙控C輪9026：9026同9027壽命相差1個月，昨日升得1仙，又係抵買嗰隻。
9026明年4月中夠鐘，輪價65仙，溢價2.6%，槓桿率19.7倍（有效12.1倍），引伸波幅12.2%。
章盛