《蘋果》推出Sudoku數字推理遊戲，幾好玩，左丁山第一次試吓，搞咗成半個鐘頭，幾乎想申請攞件風褸，但《蘋果》接收Sudoku遊戲之傳真機長鳴不通，於是放棄，相信係太多讀者玩呢個遊戲，故此jam死傳真機。
呢個遊戲，由一位本港退休法官發揚光大，幾個月前睇西報訪問佢，知道此遊戲風行日本，征服英國，至於香港𠵱家先至由《蘋果日報》引入，遲到好過冇到。外國報紙每有思考遊戲專欄，最普遍嘅就係填字遊戲與橋牌，有時見到國際象棋。左丁山曾打理過報紙，當年想話提升讀者興趣，搞益智遊戲版，但因為報紙讀者數量較少，搞起都冇乜睇頭，而且有邊際成本（譬如請多一位專門編輯負責），加印一版紙，負擔唔起，只得作罷。但《蘋果》就唔同咯喎，銷量大，讀者多，喺中產屋邨（太古城、沙田第一城之類）特別好賣！《蘋果》如果搞遊戲版，相信威力大好多，再加以市場推廣，可以奠定《蘋果日報》嘅社會影響力㖭。坦白講，如果讀者係收入低、教育程度低嘅話，搞都搞唔起啦，無謂嘥氣。
左丁山認為一版遊戲，可適合唔同讀者，好少讀者會樣樣皆精嘅啫，遊戲專欄可分（一）橋牌、（二）國際象棋、（三）象棋、（四）圍棋、（五）Sudoku、（六）中英文小問題（quiz），如《讀者文摘》以前嗰種，有齊咁多樣，老幼咸宜，中外皆備，應該受歡迎啩？有咗版面之後，再與有關機構（如橋牌會、象棋會）聯合主辦全港比賽，分初中組、高中組、公開組，以《蘋果》嘅影響力，應該搵到贊助，唔會蝕本，甚或賺少少㖭。
唔好以為遊戲係小項目，一班大孖沙如台積電張宗謀、AIG謝仕榮、惠記單偉彪、嘉禾鄒文懷等商界名人雲集香港，喺八月十六日一連六日在怡東酒店舉行亞洲城市橋牌大賽，係今年商界遊戲盛事。世界首富蓋茨亦不時參加橋牌賽，年輕人如果多學橋牌，在商界做事，有益無害，有備無患。