賭業振興成個濠江經濟及樓市，唔少人都跑到澳門搵商機。發展商以及地產代理一窩蜂走去澳門發展，既然多咗人留意當地市場，有香港傳媒人，索性過江搞雜誌，介紹澳門地產市場。 呢份《澳門置業》月刊，喺本港旺區免費派發。蘭西噚日喺中環書報攤見到成叠擺喺度任攞。內容除咗介紹新項目，又有唔少二手放盤廣告及專訪等。今期封面故事係中國海外就快推出嘅新盤寰宇天下。