八方噚日話白鴿黨唔等兩位前主席馬丁同楊森返港就去見肥龍許仕仁，但係一睇啲相，就知搞錯，因為森哥雖然對眼睜唔開咁滯，仍然堅持同達仔企喺前排見記者，報告佢哋見肥龍講咗啲乜。
咦，唔通達仔報錯料？原來連達仔見到楊森都俾佢嚇一跳，因為森哥話過趕唔到返港，所以冇預佢。而楊森開頭都以為自己趕唔到，佢噚朝同太太Irene天光五點由多倫多飛抵香港，坐咗十七個鐘頭飛機，真係頭擰擰，時差都嚟唔切適應就見到有張fax，寫住噚朝早上九點半開黨團，十一點見肥龍。於是佢同老婆講，自己洗一洗個頭就會去開會，因為佢始終係白鴿黨政制發言人，可以趕到都應該出席，於是喺政府總部就見到一個疲態畢露嘅楊森出現喇。
森哥趕得及現身，達仔好高興，認為值得嘉許，八方問達仔同森哥，第一次同肥龍交手覺得點？達仔梗係話冇乜好消息啦，不過，政府都唔易通過佢哋屬意嘅方案，因為白鴿黨九票一定企硬，至於最後如果政制原地踏步，民主派會唔會尋求司法覆核，達仔都覺得好有難度。
同程翔係舊同學
而森哥就認為傾得唔錯，不枉佢專登飛返嚟。楊森話，佢個仔重留喺加拿大讀暑期班，自己就因為港大九月開課先行回港備課。講開港大，森哥話程翔係佢港大同學，程翔高佢一班，大家都係讀社會科學院，雖然道不同，程翔係國粹派，佢自己係社會派，但係都好尊重對方。
楊森話，喺加國睇到有報道話程翔為女人而做間諜，第一個反應係「有冇搞錯」，好彩位黃女士好有勇氣，企出嚟加以否認。
間諜罪非同小可，森哥真係為呢位舊同學擔心，希望北京唔好亂嚟，至少要公平審判，可以請律師啦。重有呢單案喺海外已引起好大反響，對愛國人士造成好大打擊。
程翔被指做間諜單嘢，真係越嚟越複雜，最頂癮嘅情節當然係黃偉忽然喺香港現身。民主人士都奇怪佢點解可以落到嚟香港，重話即晚返回深圳㖭？
八方聽聞，黃偉係奉老闆之命嚟港挺程翔，又話早前已有人知會埋程太劉敏儀，話佢老公喺深圳有個女人，實行考吓佢兩公婆感情有幾深。
傳真︰2623-9278
電郵︰[email protected]