大胃王小林尊喺香港以12分鐘鯨吞100個叉燒包創紀錄，又攞多個大食比賽冠軍；見佢密密手咁塞、密密口咁吞，實情叉燒包係乜味，佢分分鐘亦未必知！計我話，到酒樓歎番一盅兩件，係一種享受，星爺都講過「飲啖茶，食個包」啦！今日唔講小林尊的「所羅門式食法」，而係去好好享受一個美味的叉燒包！
記者：招佩珊
攝影：陳陶鈞
日賣100籠出爐叉燒做餡
西苑的叉燒包堪稱全港最美味，試過單單一個午市便賣出過100籠（1籠3個），其美味吸引之處在於用料非常講究。餡料，用上成龍至愛的燶邊半肥瘦脢頭叉燒，不吝嗇以每日新鮮出爐的叉燒做包餡，叉燒餡帶蜜味同酒香，入口鬆化有肉味，與那些以雪藏肉來做餡、食落似𡁻緊豬肉乾的叉燒包，這裏的出品顯然高幾班。芡汁方面，用乾葱、洋葱、薑、蠔油、醬油及香料加水不停以慢火將材料鏟至杰身、呈醬色，過程就要半小時，做出來的芡汁呈深紅的醬色，有很香的蠔油味，加埋鬆軟的皮層，唔覺唔覺一個人輕易獨吞一籠！
做包過程
小林尊狂食鳳城叉燒包
今日呢個專題，話晒因小林尊吞包事件而起，究竟佢一個接一個係咁塞落肚的叉燒包，我們呢班正常人有無機會食到？有，比賽用的叉燒包出自鳳城酒家黃埔店，小林尊所食的叉燒包Size，同平時賣的一樣，不過正常是一籠三個包；但試吓味好喇，唔好扮勁又玩鯨吞，人家經過長時間訓練兼天生異於常人，切記！
狂試變種叉燒包
酥皮叉燒餐包$26/3個（c）
口感似墨西哥包，脆脆酥皮滲入淡淡牛油香，皮薄而不膩口，包面焗得金黃均勻，全靠師傅每隔一分鐘便將放了叉燒包的盤子逐邊轉一次，保證啖啖脆口。
焗酥皮叉燒餐包$24/3個（優惠時段$12/3個）（e）
內有叉燒餡的迷你菠蘿包，酥皮少少哋唔會太膩，略嫌餡料唔夠汁，入口較為「乾爭爭」。
蠔皇田螺叉燒包$20/3個（f）
一個包有一隻田螺，掰開時有陣陣酒香，原來加入玫瑰露酒辟除田螺腥味；但包細田螺大，叉燒得兩、三小片，似食焗田螺多過似食叉燒包。
至尊叉燒包$5/個（g）
是我見過最細的叉燒餐包，同最細Size的豉油碟差不多，成個塞入口都重有空位剩，皮睇落有點厚但實情好鬆軟，𡁻唔夠兩三下就一個！
雪影餐包$24/4個（a）
類似墨西哥包的酥皮，餡料是每日新鮮出爐的脢頭叉燒，有肉味有嚼頭，但酥皮的牛油味偏重，有點兒蓋過芡汁的香味，減輕啲牛油味就Perfect。
店舖資料：
（a）西苑酒家（28822110）
銅鑼灣恩平道28號利園2期1樓101?02室
（b）鳳城酒家（23622283）
紅磡黃埔花園8期蔡瀾美食坊2樓
（c）富聲魚翅海鮮酒家（28930881）
灣仔駱克道353號三湘大廈1樓
（d）蓮香樓（25444556）
中環威靈頓街160?64號地下
（e）鴻星海鮮酒家（26280886）
銅鑼灣時代廣場食通天10樓1005號舖
（f）Selina（28680234）
中環雲咸街安慶台地下A舖
（g）大舞臺飯店（28152311）
中環德輔道中323號西港城2樓