莫文蔚（Karen）昨日穿着和服出席記者會，簽約成為護膚品牌代言人。對於亞視高層想找她在劇集《戲迷情人》中扮演任劍輝，Karen表示若接拍便會惡補粵劇。
莫文蔚昨日一身和服look到港麗酒店出席護膚品SK-II記者會，她表示花了個半小時穿和服，Karen說：「我都唔知點着和服，所以都係大字形企喺度等助手同服裝設計幫我着。」
身為代言人的Karen表示用此產品已十年，在眾多代言人當中，她對琦琦的印象最深刻，Karen自爆收開心價酬勞，而且獲無限量的產品贊助。
仙姐滿意
早前有指亞視高層楊紹鴻籌備開拍以任劍輝和白雪仙為題材的劇集《戲迷情人》，欲邀Karen扮演任劍輝，但Karen表示毫不知情，她說：「我一啲都唔知呢件事，不過要做任姐嘅角色都幾大壓力，但係我對拍劇都幾有興趣。」
有指白雪仙得知Karen扮演任姐亦感滿意，Karen表示演出此角要惡補粵劇，她說：「如果真係要做呢個角色，事前一定要搜集好多資料，演呢類角色亦都好吸引，不過我冇聽開粵劇。」
監製欽點
亞視高層兼《戲》劇監製楊紹鴻昨日在電話中說：「我同Karen經理人傾過，佢哋都好有興趣，如果Karen冇期唔緊要，我手頭上有六個劇本，咁我咪開拍第二套先，因為我哋覺得Karen真係好適合，一定會等到佢有期先拍。」
採訪：張俊銘
攝影：陳偉權
