電影《千杯不醉》前晚舉行啤酒女郎選舉，勝出者可獲得電影合約一份，但導演爾冬陞事先聲明只會是小角色。而戴夢夢和Toby均表示拍《千》片期間被爾冬陞鬧過，但爾冬陞自言不會當面鬧演員，只會鬧副導演。
電影《千杯不醉》前晚在尖沙嘴一間酒吧舉行宣傳活動，出席者包括爾冬陞、方中信、尹子維、梁靖琪（Toby）和戴夢夢等，但男主角吳彥祖因發燒未能到場，女主角楊千嬅則因啤酒贊助商問題而不便亮相。
口徑不一
現場請來六位啤酒女郎穿上比堅尼選美，冠軍可得到一份電影合約，但爾冬陞說：「其實都只係宣傳啫，大家唔使咁認真，到時睇吓有邊個角色啱佢做，都係細角色啫。」
對於有報道指爾冬陞不滿意楊千嬅的演技，他說：「呢啲新聞唔需要理會，過一段時間大家都唔記得，亦唔需要特別澄清。」
爾冬陞亦否認曾在片場責罵戴夢夢和Toby，他說：「我都做過演員，唔會喺片場兜口兜面鬧佢哋，只係鬧副導演啫。」不過兩位演員卻承認曾經被罵，戴夢夢說：「係我自己好抵鬧，我喺片場一見到導演就心跳加速，好驚，可能導演捱更抵夜躁火啲囉，我冇乜所謂。」Toby則笑說：「我送咗張唱片畀導演，上面寫住『多謝指教、多多教訓』，本來我諗住送埋張poster畀佢，但導演話唔使客氣，唔想再見到我。」
大讚栢芝
此外，爾冬陞早前在內地接受記者訪問時，指張栢芝是一個擁有超凡演技的演員，雖然拍《旺角黑夜》和《忘不了》時都不太專心，但拍出來的效果卻很好。提到張國榮拍攝《異度空間》其中一幕跳樓戲時，爾冬陞表示雖然自己在旁摟着他，但張國榮怎麼也不敢踏出那一步，所以他經常想對方的自殺念頭是否因拍這部戲而產生，更決定不會再看這齣戲。
採訪：馮美茵 攝影：仇志德
