數碼港榮升名人戲院
馮仁昭四圍超：趙世曾、Wendy拍拖三人行

數碼港百老匯戲院有幾咁受圈中人歡迎，齋睇連日嚟嘅報道都可見一斑啦！自從李嘉欣同龐維仁俾本報踢爆喺數碼港戲院睇戲後，大前晚又有譚詠麟一家三口捧TonyJaa（柏朗伊雲）場，睇電影《冬蔭功》享天倫，前晚趙世曾亦同女友Wendy拍拖睇戲，而且佢嘅口味同阿倫一致，都係睇《冬》片。

街頭煲電話

前晚九點幾，着住西裝嘅趙世曾同Wendy一齊喺數碼港百老匯戲院睇《冬》片，睇完戲之後，身穿露臍Ｔ恤、外披薄褸嘅Wendy同男友一齊步出戲院，二人企喺街頭各自打電話，煲完電話粥之後，佢哋又喁喁細語，其間見Wendy都十足小鳥依人，間中都會扁吓嘴向男友撒嬌。
趙世曾同Wendy吱噚一輪後，一名貌似趙世曾兒子趙式浩嘅男士施施然出現，三個人並排企喺街頭，等咗大概半分鐘，就由司機駕駛趙世曾部勞斯萊斯房車接載三人離開。