自從金屬電子交易所（8161）同埋中國蜂業（8156）轉型大陸彩票股急升後，陸續有創業板股無厘頭炒作，噚日炒得最勁係優能數碼（8116），隻股最高升過1倍見0.168元，收0.15元，勁升92％。
雖然隻股成交大增，股數有1337萬股，金額172萬元，但經紀陳話四圍收過料，並無古仔在背後支持，聽講有個炒家坐咗唔少貨，今次只係趁勢炒番轉，慎防炒家一放手，想落車都走唔到。
另外，前日公布業績後一度急升的國美電器（493），昨日股價顯著回落，大跌7.76％，至5.35元。經紀黃話，股價下跌，並唔係投資者趁好消息出貨，而係另有原因。
雖然國美公布中期業績，盈利上升4.5％至2.42億元，中期股息每股4.2仙，但芬佬並唔滿意，原因係發覺國美邊際利潤有受壓迹象。
由於大陸家電零售競爭劇烈，以及大陸店舖租金存在大幅上升的問題，但據講國美仍堅持繼續開新舖，難免成本增加，基於盈利增長可能冇咁理想，芬佬沽貨並唔奇。
慕容小初