【本報訊】衞生福利及食物局局長周一嶽表示，若採用強制或選擇性醫療保險方案，會考慮向中產人士提供稅務優惠，現正與財政司司長研究可行性。有中產人士團體指，單是繳交稅款、強積金及「強醫金」已佔薪金四分之一，安排極不公平，對政府忍無可忍，直言港府是「打劫全香港納稅人」。 記者：張嘉雯
衞福局昨起一連兩日舉行諮詢會，了解巿民對醫療改革討論文件的意見。「中產之星」主席李子榮在會上反對醫療供款的建議，要求政府將計劃押後兩年，「我哋打工仔嘅人工，有17%用嚟交稅，5%供強積金，局長之前接受訪問，又話強醫金唔會少過1%，人工四分一都無咗……咁做係打劫全香港納稅人。」
或提供稅務優惠
周一嶽在會後稱，為令巿民了解在醫療上投入更多的資源是物有所值，日後若採用強制或選擇性保險方案，會向巿民提供特別優惠，特別是中產人士稅收方面，詳情交由財政司司長研究。
長期病患者梁昌耀則認為，政府不應放棄弱勢社群，即使每次一百元的私家醫生診金，對長者或長期病患都是重擔，「其實我哋好想依賴（公營醫院）咩？無病嘅話幾好㗎！我聽到你哋提出嘅報告真係覺得好心痛，因為你哋又係講番錢。」
衞福官員惹眾怒
諮詢會歷時兩小時，巿民須先將題目寫在紙上，再由主持人抽籤選出來表達意見。衞福局署理副秘書長陳煥兒先用逾二十分鐘介紹討論內容，有巿民聽得不耐煩，在座位上大喊，「你重要講幾耐呀，份報告我哋可以返屋企自己睇呀……你哋都唔聽我哋講嘢，自己講完就走，咁你哋講埋佢啦！」台上的陳煥兒未有理會巿民的要求，繼續「朗讀」討論文件內容，場內人士開始起哄，要求舉手提問，陳被迫中止朗讀，周一嶽與其他政府代表惟有回到台上，開始回答巿民提問。