小小超隻8號仔電盈噚日忽然炒起，相信係炒聽日公布業績有好消息，事實佢哋受不利傳聞困擾，喺藍籌中又真係落後。前幾日，電盈煞有介事咁出咗份聲明，話證監發信向佢哋確認，冇查過電盈主席李澤楷。證監一向好少對外證實或否認調查工作，今次咁做自然令人注目，令人以為有人獲厚待。不過，據八方打聽所知，證監以往其實接過一啲公司或個人查詢，係唔係俾證監調查，證監會視乎情況作出答覆，所以今次對小小超並非開先例。
講開證監，噚日兩份本地英文報章都引述消息，話接替下月離職嘅證監主席沈聯濤者，好有可能係來自加拿大證監嘅洋人。八方即時聯想到，莫非係馬時亨介紹嚟？皆因肥馬早年曾喺加拿大證券界工作，自然識落唔少朋友，如果被視為監管最嚴嘅美國搵唔到啱心水，去北一啲搵人都要㗎啦。
爆料熱線：29290000、27860099
報料傳真：26239278
報料電郵：[email protected]