屢傳財困嘅關淑怡最近獲MusicNation以二百一十萬元邀請，準備下年二月喺紅館開三場演唱會，馮仁昭聽聞個演唱會雖然重未落實，但實行成數都幾高。
三十蚊埋單
○一年未婚產子嘅關淑怡，囝囝Dick已經四歲大，所以斷估佢開演唱會都係為咗小朋友將來嘅生活費，由於佢暫時未有嘢做，所以前日三十九歲生日都過得既低調又經濟。
前日下晝兩點，冇化妝嘅關淑怡拖住囝囝Dick離開愉景灣寓所，然後搭車到愉景灣碼頭嘅麥當勞食嘢。同媽咪個樣有七、八成似嘅阿Dick同媽咪講：「媽，我要orangejuice（橙汁）。」於是關淑怡就買咗個價值二十一蚊嘅魚柳包開心樂園餐同一罐汽水，埋單大概三十蚊。
之後關淑怡同囝囝就去咗露天位置坐，一個餐兩份食，佢見囝囝塊面污糟咗，就好細心咁幫佢抹面。即使阿Dick行去廣場同其他小朋友玩時，關淑怡嘅視線都冇離開過個仔，確實係無微不至，兩母子喺廣場逗留約四十五分鐘後就返屋企。
