歐美配額糾紛令紡織股積弱好耐，而龍頭股魏橋紡織（2698），因為斥資30億銀人民幣向大股東收購電廠，無端白事偏離本業，班芬佬唔理三七廿一即刻沽貨，令股價前日勁跌近8%至52周新低。
經紀黃話，噚日班芬佬定過神之後，揸住本股東通函睇真啲，又發覺唔係太過份，所以又買番轉頭，令隻股升返4.28%，收9.75元，成交股數有1003萬股，金額9691萬元。另方面，當然亦唔排除係有人博反彈，借機短炒一轉。
雖然魏橋今次咁大手筆，用成30億銀買電廠，但實際上有27億銀係發行外間人買唔到嘅內資股支付，公司要使嘅現金有限，況且大陸周不時鬧電慌，家陣有間私家電廠，唔怕停電影響生產。
另外有人計過條數，話買咗大股東間電廠後，每年用作電力的使費，會比以往向大股東交電費平好多，對盈利有貢獻咁講。
小初記得魏橋久唔久都會失驚無神嚇股東一餐，好似上次搞財務公司已經嚇一次，今次又整多一劑，真係心血少啲都頂唔住。
慕容小初