上半年樓市大旺，地產商猛嗌買唔到地，又猛鬧政府勾地門檻太高，卒之迫到孫公讓步，接納「八折勾地」。當時個個地產佬都話好又話支持，點知，政府前日公布，原來搵一個人入紙去勾地都冇。
地產商嘅支持有幾堅，可以想見。（忽然諗起，吳光正其實都係地產商，田北俊亦係）地產界老友就笑八方老實，佢重話業內近來見一手新盤銷路唔好，改口話二手舊樓有升勢，實情係點呢？舉個例畀大家睇睇喎。
觀塘麗港城係大屋苑，近來有奇景，就係好多六百幾呎嘅小單位放盤，有成四五百個咁多，情況好罕見。而個價就陰陰跌，好似叫緊二百二十萬嘅，最後二百萬就成交，唔覺唔覺已經跌咗五個巴仙，反而同一屋苑嘅大單位就硬淨好多。
點解會咁？當然係因為上半年市好時，吸引咗一批業餘炒家入場，佢哋能力有限，只炒細單位，揸咗幾個月，結果都要投降，情況令人好擔心，所以佢奉勸大家自己執生，唔好信晒地產商。
爆料熱線：29290000、27860099
報料傳真：26239278
報料電郵：[email protected]