隨住煲呔曾強勢上場，八方聽聞捱義氣撐咗幾年嘅梁愛詩，真係好有機會喺年尾走人，過番啲優哉游哉嘅生活；而佢嘅接班人，𠵱家都係以廣管局主席馮華健呼聲最高，但有政界中人開始擔心，一旦人稱太子馮嘅馮華健真係同煲呔拍檔，屆時政府開會嘅火藥味一定好勁。
兩個都係性情中人
點解會有咁嘅擔心？咪就係因為太子馮同煲呔一樣，都係性情中人，脾氣剛烈，有啲跟過佢嘅徒弟，幾乎全部都領教過師傅嘅威嚴，見過佢嬲爆爆時怒擲文件嘅霸氣，單單係呢一點，都已經同煲呔有得揮。假若兩位港英時代精英，真係做埋合作夥伴，試問開會時嘅火花，又點會少得過𠵱家？
太子馮雖然好大火氣，但佢對待傳媒就留有一手，好少有惡形惡相嘅一面，有政界人士就分析，太子馮都估到自己政途有機會更上一層樓，又點會自斷米路，同媒介搞壞關係？所以政界人士都大讚佢政治手腕認真一絕。
講到真正政治家，就不得不提教育統籌局局長李國章。喺呢個政府以為保皇黨奉旨保皇嘅時代，幾乎只有亞瑟王一個，識得尊重議會，無論大至三三四改革，小至啲些微撥款，亞瑟王都會親自打電話畀各黨派議員游說，好識做。下任政務司司長，捨佢其誰？
姑勿論佢係咪表面工夫，但已經令到班議員好冧；就算唔支持你，都會插少你幾嘢，呢啲咪就係真正識玩政治嘅人囉。據知馬仔馬時亨都係好識做嘅人，不時都肯抽時間見吓各界代表，席間又會做吓戲，令與會者好信佢，喺政治上算撈得唔錯，不過馬仔前途當然冇亞瑟王咁光明。
林D9老馮有人保皇
講到有人有政治智慧，當然有人亦好冇啦。八方聽聞眾多局長中，林D9都算係最老馮以為保皇黨要奉旨保皇嘅一個，每次都係等到最驚青又或者去到就嚟唔掂嘅地步，先至肯親自同議員傾吓偈。
有啲新議員重話，上任至今，幾乎個個局長都約過佢飲茶灌水，惟獨林D9未有任何行動，試問喺咁嘅情況下，大家又點會有互信呀？
爆料熱線：29290000、27860099
報料傳真：26239278
報料電郵：[email protected]