數學大師丘成桐到北京訪問，竟然開口猛烈批評中國學術界腐敗之風，院士級人馬照樣抄襲，北大某位數學博士寫一篇論文，程度等於香港中文大學學士，與哈佛水準相差甚遠（見《文匯報》，八月十四日）。丘大師又講到中國啲大學水準唔係咁高，現時啲名校學生去到美國讀書，考試成績經常排名在最低嘅三分一。
丘成桐久享盛名，講說話公開啲、大膽啲，都冇人敢講佢博出位，最多暗中杯葛佢啫。不過中國內地啲學生俾佢彈完，申請獎學金到美國讀書唔知會唔會有影響，美國自九一一之後，官僚患上「反恐症」，收緊晒學生簽證，所有外國學生即使收到美國大學發出嘅I20，都有一半機會攞唔到入美國嘅簽證。
有幸入到美國境又如何？一位美國名校學生返嚟香港放暑假，喺一個派對度見到左丁山，經佢母親介紹，打開話匣子，學生話：「現時外國學生處境唔係好理想。我哋一啲成績好嘅學生受教授賞識，幫教授做研究，理所當然有薪水，但係九一一之後，即使批出研究基金，就有官員干預話要美國學生優先，點解要請外國學生做？教授為免研究基金受損，就會對外國學生講：不如你唔好收錢，當跟我學習啦。你話幾搵笨呢。」
以前優秀學生畢業後，會有美國公司聘請，代搞工作證，等學生留低後做幾年就可以申請綠卡。現在難咯，上述名校學生話，佢幾位師兄師姐畢業後搵到工，點知美國官員將僱主麻煩到死，成日要公司解釋點解唔請美國學生或已有綠卡在手嘅外國學生，公司不勝其煩，最後與外國學生提前解約。呢位名校學生話，佢哋同學之中，已不再寄望於畢業後可以留低，讀完書就立即鬆人回國。邊一個損失大啲呢？梗係美國啦，美國人根本唔多喜歡讀理工博士學位，幾十年來招攬咗不知幾多外國人才，𠵱家美國逼外國學生回國，第三世界可免人才流失㖭。