恒指跌22點，有20點由中海油（883）拖低，有7點由滙控（005）拖低。期指跌60點，低水73點。
滙控拉鋸得好厲害，高低60仙，埋單價128.90元，跌20仙。今日除息1.09元，理論價127.80元，如果今日造理論價，即係唔升唔跌，將拖低恒指39點。所以，昨日期指實際只係低水34點。
恒地C輪4593：恒地（012）月初見41.15元後，連續多日向下，開始定得住，昨日最高39.55元，收38.90元，有10仙進帳。又睇吓長實（001）跌到86.10元後，有力彈番上86.75元收市，反升10仙，相信短期內大隻地產股有運行，包括恒地。
恒地諗住有運行，摷C輪炒，搏殺格，向9125埋手，隻輪溢價稍高，但槓桿率亦非常爆炸（37.4倍）。唔想腎上腺升得太急，4593比較啱。4593明年1月上旬夠鐘，輪價35仙，溢價3.8%，槓桿率11.1倍（有效7.3倍），引伸波幅25%。
新世界C輪9044：諗住地產股有運行，買啲新世界C輪9044。呢隻上周四推介過，曾由91仙殺上1.18元，升幅3成。現價99仙，有得諗。隻輪明年2月到期，溢價6.5%，槓桿率10.4倍（有效6.5倍），引伸波幅21.2%。
隻輪數據唔算好靚，但已係新世界C輪中最靚嗰隻。
章盛