和黃（013）近期表現大強勢，噚日大市調整，和黃仍能逆流而上，市場憧憬其中期業績會有驚喜，而管理層對前景亦會有正面的訊息，令股價持續造好。和黃將於下周四（25日）宣布中期業績。
今個升浪，和黃由7月初的70元起步，反覆升到近日的80元水平，在高位形成上升三角旗，噚日破位而上，短線上升目標將指向83元。
大行對和黃的看法更為樂觀，大摩將和黃的目標價大幅調高到90元；里昂最新的報告則指和黃旗下3G業務陸續分拆套現，有助提高集團的現金水平，而加拿大赫斯基能源若能以溢價出售，亦有助提升每股資產淨值，里昂指和黃每股資產淨值91元，目標價亦係91元。
對和黃業績有利的因素，包括3G經營前景漸趨樂觀，有機會轉虧為盈；赫斯基因油價上升而有突出表現，今年上半年盈利7.78億加元，上升61%，估計05年全年對和黃的盈利貢獻，可由去年的28億元上升到53億元，升幅88%；重有，由於基建和物業價格上升，估值也會相應提升。
睇好和黃短期可升3元，兩隻C輪可留意。4897今年11月7日到期，重有兩個多月玩，收0.75元，升9仙，溢價1.6%，槓桿率10.7倍，和黃升上83元，而4897溢價收窄到1%，股價最少亦可升到1元水平。另一隻長1個月到期嘅C輪4903，噚日升幅成21%，4897升得少，追得過。
另外，由價外變成價內嘅和黃C輪9130，升勢亦會好有爆炸性。9130係明年1月27日到期，認股價80元，噚日收0.52元，升9.5仙，溢價6.4%，槓桿率15.4倍。睇長啲，和黃升到大行的目標價90元，9130就算平水，股價亦可見1元，翻一番。
華脈通信有人睇中
細價股中有一隻可以諗，就係華脈通信（499）。呢隻股票，一年例炒兩三轉，但今次消息好勁，唔似乾炒咁簡單，聽聞內地有家大企業睇中佢，而出手會幾吸引，雙方有進一步發展嘅機會好大。華脈噚日衝上10仙回番落9仙收，急升後嘅正常調整，消化完之後，應該重有得去。
郭兆誠