八方噚日寫置地文華東方酒店下個禮拜三開業，請李嘉欣做嘉賓，咁冇理由唔寫埋文華東方嘅對手，位於國金中心嘅四季酒店。四季在全世界好有名，香港以前冇，下個月就有，由於位置一流，加上四季個品牌，所以話要成三千幾四千蚊一晚。據講置地文華東方就昅實佢個價，以便迎戰。酒店界老友話，酒店嘅房價千變萬化，實價同訂價有好大距離，係商業秘密，所以旅行社、同行都有專人扮客去check價，以知己知彼。
文華東方有百幾間房，四季就有四百間，大好多，但雙方都要做到最好，唔可以失禮。八方知道文華早幾日請啲夥計去遊覽香港名勝，等佢哋做一日遊客，以便將來面對啲真正遊客時有嘢講。四季亦抽調外地精銳來港助陣，好似餐飲部門就搵咗紐約一位同香港有關啲高層嚟幫手。呢位猛人嘅爸爸，政圈人人都識。
爆料熱線：29290000、27860099
報料傳真：26239278
報料電郵：[email protected]