港人北上消費、就業，或者自置居所都日見上升！最近重實施智能身份證過關，比起10年前，往返國內真係簡單快趣咗好多！但係大家一直討論緊嘅「一卡兩通」問題重未實現，喺呢個時候，同樣標榜「一機兩通」嘅手機已趕上使用！講緊嘅係由國內網絡商中國聯通推出嘅「世界風」手機W219，支援CDMA1X制式之外，還加多一個卡槽位用嚟插香港SIM卡，港人過關之後重要拆電換卡咁煩？NO喇！
記者：陳國輝
攝影：陳盛臣、陳國輝
ImageGirl：Chrissie
所謂「雙模」，就係機身支援UIM及SIM兩種卡咁解。SAMSUNGSCH-W219屬於「世界風」系列CDMA1X產品之一；因為其覆蓋範圍只限於大城市，相比GSM嘅全國覆蓋率而言，確實相差太遠！W219行雙插卡，一方面支援CDMA1X高速數據傳輸（153.6kbps），二來可通用GSM網絡，加上外形比上代雙模機的骰及輕巧咗，對於貪方便嘅中港人士嚟講就最啱用！
一鍵式換卡好爽手
W219除解決咗CDMA1X/GSM兼容問題外，重幫香港人返大陸時，解決咗每次換卡嘅煩惱！筆者試過將「神州行」（中國移動）及「新世界」兩張GSM卡，分別插入「卡槽1」及「卡槽2」成功使用；即係話，如果同時插住香港SIM同埋大陸UIM/SIM，過關嗰陣就唔使拆電換卡喇！W219特別喺機側加入「換模」專鍵，一按即時轉換另一張卡；另外，開機嗰陣亦會詢問你用邊一張卡，夠晒周到！
特別提升影畫質素
SAMSUNG第一部雙模手機W109，雖然可同時插入兩種卡，但除此之外，娛樂功能欠奉。W219今次特別着重多媒體表現，鏡頭增強為130萬像素，能拍1,280×960解像度照片，及影九合一「LOMO」相，至於趣味相框、特殊效果更不在話下；影片支援解像度為176×144嘅MPEG4格式，可無限時拍攝，聲畫速度總算啱「嘴形」；可惜除內置60MB容量之外，欠外置記憶卡槽，略嫌不足。
內置卡拉OK功能
W219音樂播放功能都幾強，機面設置有專用播歌掣，聽歌一㩒即聽好方便；由於機身並冇設置記憶卡插槽，所以手機特別加入USB插口，可直駁電腦抄歌，咁日日換歌都好方便啦！此外W219重加入咗卡拉OK功能，歌手一邊唱歌嗰陣，歌詞會逐句顯示喺屏幕中間，等你跟住嚟唱！據知用家只需使用中國聯通CDMA1X服務，就可以透過網絡服務作下載，咁成日轉歌都得啦！
Profile
Profile
制式：CDMA1X/GSM900/1800
體積：88×46×24.2mm
重量：114g
屏幕：雙26萬色TFT彩芒
通話時間：150-300分鐘
備用時間：100-200小時
主要功能：一按式換卡掣、130萬像素鏡頭、MPEG4影片、MP3播放器、MP3鈴聲、卡拉OK、60MB記憶容量、藍芽、紅外線
