大市市底真係好強，外圍股市雖然不濟，但港股跌唔落，收市15466，升15點，成交214億元。
短期市勢冇錯係有需要調整，但資金重係源源流入，為大市提供上升動力，恒指預計會升到15800，先會出現今個升浪的第一個真正的調整。滙控（005）大落後（同其他大藍籌相比），噚日收129.10元，跌0.10元，但好多滙控C輪已發力，例如3821收0.315元，升1仙；3777收0.255元，升2.1仙，升幅8.9%。窩輪先行，睇嚟滙控已有㩒唔住之勢。
3821低水0.73%，已經計咗滙控除息嘅因素，未來呢個多禮拜，滙控起幾多，佢就會起足，若滙控升3元，3821可以翻一番，見0.60元。3777在10月先到期，有排玩，今次大圓底兜上去，有機會補番今年3月初0.485元至0.415元的大型下跌裂口。
中國人壽（2628）破位而上，收6.25元，升0.20元，兩隻C輪，3966高收0.74元，升15仙，升幅25.4%；3524亦高收0.35元，升7仙，升幅亦有25%，國壽短線睇6.40元，兩隻C輪可以止賺位繼續持有。
預測PE僅8.4倍
另外一隻要留意嘅中資股係中國電信（728），收3.20元，升7.5仙。過去6個月，中電信走勢成個大型圓底，近日衝破3.075元的頸線後，升到3.20元出現後抽，噚日高收，一確認整固完成，以大圓底的量度升幅來衡量，目標3.60元。
中電信04年（12月結）業績出色，營業額1612億元（人民幣．下同），升6.4%；盈利280.2億元，升101%，每股盈利0.36元。中電信每3年至少重估物業一次，04年重估物業減值12.62億元。
05年，互聯網業務繼續為中電信提供盈利增長動力，而物業重估減值不會再出現，估計盈利可上升10.7%至310億元，每股盈利約0.40元（約0.38港元），預測PE8.4倍，即使升到目標價3.60元，PE亦僅9.4倍。
看好中電信，C輪4500可追捧。今年2月中起，4500成個大圓底，噚日以大陽燭升破0.44元頸線，照度上去，目標價係0.78元，預期升幅近70%。
郭兆誠