雖然油價係咁升，利率又上揚，但似乎無礙炒股氣氛，唔少細價股炒家亦忍唔住出嚟露兩手，上個星期大陸彩票股升幅驚人，兼且有人即刻趁機批股集資，噚日又輪到停牌成年有多的東成控股（735）復牌，勁升47.29%，收0.19元。
經紀陳話，江湖傳聞東成搞咁耐先至復得牌，必然重有後着，東成復牌即公布供股，10供3，每股0.10元，集資5760萬元。睇嚟一復牌就炒成咁，班股東應該會肯參與供股。
不過，小初就覺得家陣大把股票炒，唔一定要炒高風險的三四線股，好似先一排掛牌上市的半新股，唔少都有值博率，好似喺6月底上市的海灣控股（416），由大摩做保母，雖然上市以來股價一直潛水，從未見過1.72元的招股價，但大摩本身硬接咗唔少貨，點都會想吓辦法甩身。
海灣控股將在8月23日公布首個中期業績，隻股新簇簇，通常開頭業績都唔會差，況且家陣大市氣氛好，好多先前潛水的半新股都升番晒，所以海灣亦有得諗。
海灣昨日升6.7％，收1.42元。
慕容小初