亞視舉辦嘅《2005亞洲小姐競選》就快舉行，九位香港特區賽區佳麗噚日喺葵芳新都會廣場同市民近距離接觸，啲佳麗着上三點式泳衣出場自我介紹，吸引大批市民圍觀，現場重有個阿伯自備望遠鏡嚟昅女，好鬼搞笑。由於部份佳麗廣東話講唔正，所以鬧出唔少笑話。
大部份佳麗明顯未收身就着三點式出嚟見人，都算係勇氣可嘉，而其中3號袁詩媛個樣算係最省鏡嗰個，但係就俾個小肚腩累死。而9號陳詩敏下圍有成三十七吋，算得上係「籮霸」，估唔到佢揀咗條最性感、側邊縛繩嘅泳褲嚟着，佢重好有自信咁話揀幼邊啲可以令雙腿睇落長啲，最慘係弄巧反拙啫！
九位佳麗之中，1號王婧以三十四吋上圍力壓一眾佳麗，成為最有料之人，而佢亦知道自己要減肥，問佢擔唔擔心連上圍都細埋，佢就話：「咁減肥度度都會瘦㗎喇！」
亞姐工作人員打人
另外，有讀者投訴上星期六喺肇慶俾亞姐嘅工作人員呼喝同武力對待，亞視高層葉家寶噚日回應話嗰班係亞視喺內地搵嘅幫手，唔係亞視正式員工，而當日亞姐喺肇慶宣傳樓盤，可能保安同工作人員太緊張，先至同嗰兩母子產生誤會。
