國泰開樂與怒派對，行政總裁陳南祿表演主音結他，總經理級人馬上台獻唱六七十年代勁歌，全部着牛仔褲、短袖Ｔ恤，手臂「紋身」，耳仔戴假耳環，呢班大佬玩起上嚟，唔講得笑，諗諗吓，香港有邊間大公司可以搵一隊高層人員組成樂隊，與國泰鬥癲呢？唱片界大佬鄭東漢（NormanCheng）或者可以諗諗，TVB總經理陳志雲與陳南祿喺香港大學差唔多時候畢業，不妨由TVB發起，國泰贊助，搞一個全港公司樂隊大比拼比賽，為公益金籌款（陳南祿亦為公益金之橋王），辦法如下：TVB不收任何製作費；直播決賽當晚之廣告收入，全撥歸公益金；評分標準分兩項，（ａ）由許冠傑、鄭東漢、泰迪羅賓、UncleRay、方逸華、劉德華等組成之評判團評分佔六成，（b）參賽公司之職員捐款數目佔四成（即捐款支持自己公司之樂隊，捐得多就得分多）。
上述呢條橋，左丁山免費贈送，不收知識產權費，假如滙豐嘅鄭海泉、邵銘高上陣；中電有阮蘇少媚為主音歌手，中銀出到和廣北唱崔健名曲，轟動必矣，公益金相信一晚可籌得一千萬大元！
喺派對之中，碰到不少航空界、旅遊界、銀行界名人，撞見靚女Ｆ，幾乎唔認得，乜成個人好似膨脹咗兩倍，潮流唔係興瘦身嘅咩，做銀行工唔係咁緊張吖嘛，做到成個人肥晒？名校MBA課程冇教纖體呀？靚女Ｆ話：「你統統估錯晒，我三個月前產下女嬰，所以咁肥。」左丁山立即教佢去搵蔣麗莉或者屈穎妍，睇吓人哋生咗三個，點樣極速瘦身。靚女Ｆ大笑：「我唔可以瘦身，要餵奶，身形要肥啲。」一講就令左丁山肅然起敬，醫生話媽咪餵人奶，嬰兒會健康啲，發育好啲，但現代女性有邊個肯餵人奶呀，生baby都唔肯啦，估唔到靚女Ｆ居然肯為女兒犧牲寶貴時間與大量心血，堅持要餵人奶。聽靚女Ｆ一講，左丁山好奇，想知道香港究竟重有幾多媽咪係餵緊人奶咁偉大，讀者如有統計資料，請通知。