徐小鳳前晚補演早前腰斬的一場個唱，正式結束她今次復出演唱會，當她獻唱《無奈》一曲時，忍不住感觸落淚，連最後一句歌詞都唱不下去。
徐小鳳在紅館舉行的《金光燦爛徐小鳳演唱會2005》前晚終於圓滿落幕，小鳳姐早前曾因失聲腰斬個唱，前晚補場演出，她開場時說：「多謝你哋再一次返嚟支持我，有冇返齊嚟呀？我感覺到你哋一定唔會失約，我都唔會失約。」小鳳姐前晚演唱頻頻飲水，她說：「我自從上次瘀咗，晚晚飲好多水，未試過喺台上飲咁多，但我忍得住。」
「差一句捱唔到」
小鳳姐前晚以《無奈》一曲作完場，之後才再安歌，當她唱至《無》的最後一句時，忍不住流下開心淚，小鳳姐哽咽着說：「真係失敗，差一句都捱唔到，又瘀咗少少。」有觀眾大叫：「唔係你嘅錯，係社會嘅錯。」小鳳姐轉涕為笑，她說：「真係唔捨得，其實我好開心，但一激動就封喉。」
小鳳姐前晚獲肥媽、鍾鎮濤（阿B）及杜麗莎上台助陣，肥媽與奶奶一同到場，她首先上台獻花，並說：「我奶奶八十二歲，成日都話只識PaulaTsui（徐小鳳）。」小鳳姐遂對着觀眾席說：「你好，奶奶。」肥媽即糾正道：「你係叫伯母，奶奶係我嘅。」惹得哄堂大笑。
後來肥媽上台獻唱，又大講瘦身歷程與治夫方法，她說：「做女人好辛苦，重要留住老公，姣婆你自己唔做，就有人幫你做，瞓喺度死魚咁，就梗係走啦，女人把口成日都唔好，叫老竇做死佬，又叫仔女去死。」
讚阿B好好先生
小鳳姐忽然問道：「如果你發現你先生背叛你，咁點？」肥媽說：「唔緊要，衰過佢周街都冇，好過佢周街都係。」
小鳳姐之後又請阿B上台，大讚他是好好先生，阿B大女鍾嘉湄坐在貴賓席欣賞。小鳳姐前晚唱至十二時才結束，超時被罰五萬元。
採訪：駱華齡 攝影：陳偉權
