僥倖活過來
關耀華 82歲香港華人軍團
「重企得喺度算好彩，又做過戰俘，又去過緬甸從軍，返得到來香港，好僥倖。日軍入侵嗰年，我只有十八歲。開戰冇幾耐就被日軍俘虜，入咗深水埗集中營。我偷走過兩次，第一次畀日軍捉到，第二次趁佢哋交更，偷偷地剪開圍住營地嘅鐵絲網，成功逃脫。之後跟英軍去咗緬甸北部攻打日軍，我當步兵，畀日軍圍攻咗七個晝夜，氣氛好緊張。」
最緊要太平
馬迺光 91歲英國海軍
「我隸屬深水爆破隊，最初留守喺英軍魚雷廠，即係𠵱家中港城嘅位置。日軍來到，發炮襲擊魚雷廠，十二人死咗十個，得番兩個，一個係我，由添馬艦送咗去香港仔；一個做咗戰俘，兩年後死喺軍營。能夠僥倖生存，我明白處世最緊要太平，要做多啲好事。打完仗之後，我冇仇恨日本人，我去咗日本做生意，一做就做咗十九年，重娶咗個日本太太。」
要日本認錯
徐國峰 應屆高考生
「我第一次參加有關抗日勝利嘅遊行，全因日本到𠵱家都唔肯認錯同賠償。日本戰敗六十年，應該受到應有制裁，但佢哋至今仍然唔肯認有入侵中國，重將侵華歷史描述到好似聖戰咁，簡直冇一啲羞恥心……我會繼續參加遊行同抗議日本嘅活動，直至佢認錯為止。」
