將軍澳君傲灣開賣咗一段時間，新鮮感欠奉，加上同區就快有全新樓盤開售，購買力封鎖，發展商新世界，為咗吸引更多人流，噚日喺售樓處搞兒童體操同樂日活動，請咗「奧之星體操隊」到場表演。
呢隊兒童體操隊，隊員由七至十一歲，有豐富公開表演經驗，今次派出八個隊員，由下晝兩點半開始，一共表演咗三場，每場約二十分鐘，喺二十分鐘內，八個隊員先後表演熱身操、集體翻騰和跳彈床，其中難度甚高嘅翻騰動作，贏得唔少掌聲。
新世界話，君傲灣一向標榜健康家庭生活，不時都會舉辦相關活動。區內代理話，君傲灣噚日嘅人流，比過去周日多出一倍，氣氛熱鬧，可惜睇嘅多，買嘅少，總結兩日，只有一宗成交。
電郵地址：[email protected]