食肆打得正旗號賣「正宗」，若非對出品有絕對信心，大抵只是譁眾取寵的宣傳伎倆。然而，豐澤園肯定是實力派，老饕對豐澤園唔會感到陌生，80年代，正值京菜館的全盛時期，洪長興、鹿鳴春、松竹樓……還有豐澤園，都是當年一等一的老字號。經過多番起落，這家老字號近日重現尖沙嘴，好讓食客嘗一口正宗京菜；加上新張期內食滿$300送$260烤鴨一隻，超筍喎！
記者：招佩珊
攝影：伍慶泉
老牌京菜再戰尖嘴
時勢所趨，現時外省菜館偏向大雜燴，尤其是京川滬菜館開到成行成市，打開餐牌，真搞不清哪些是京菜、川菜。更可惜的是，要吃正宗京菜，老字號卻一家家關掉，豐澤園負責人張生說：「80年代全盛時期有40多間京菜館，尖沙嘴就最多，洪長興、新洪長興、鹿鳴春、樂宮樓……家陣就得番兩、三間。」豐澤園早在60年代於尖沙嘴赫德道起家，其後搬到寶勒巷，「60年代已經在豐澤園工作，80年代成為股東，之後去咗新加坡同上海搞飲食業，其間都知道豐澤園關掉，大概係94-95年。」
2003年張生返港有意再搞飲食業，眼見香港少有正宗的京菜館，「對京菜始終有種情意結，自小在尖沙嘴區長大同工作，再做京菜都要揀番呢一區。」
經驗大廚×失傳京菜
要做正宗京菜，要靠一班經驗大廚「煮持」大局，機緣巧合，張生找來舊時在豐澤園合作過，以及曾在新洪長興當大廚的師傅們坐鎮，每位均有超過20年京菜經驗，品質相當有保證。打開餐牌，除了有較多人認識的京菜如涮羊肉、烤填鴨、醬蹄等，當中不乏幾近失傳的老派京菜，像鹽爆雙脆、油爆管廷、燒肥腸等，張生說：「好少菜館做呢類內臟菜式，皆因工夫多，洗得唔乾淨便會帶腥臭，要去正宗京菜館先至食到。」的確，記者去過不少京川滬菜館，都未見過這幾道菜。而在餐牌內更發現些特別的名字，甚麼愛窩窩（甜品）、片兒湯（麵類），「陸續會加入更多老派菜式，希望食客認識到真正的京菜。」簡單點亦可於午市叫些麵點，吃一口京菜風味。
烤北京填鴨$260/隻
有成4斤重的烤鴨，大大隻、脹卜卜、金紅的外皮，看起來就刺激食慾。薄餅煎得帶點焦，不厚不薄，包着鴨片、京葱、甜醬，一口咬下去，滿口油香，又脆又腴美，但好飽肚，一隻鴨起碼片到40塊，食唔晒可以打包，不過翻叮會失真，總不及新鮮熱辣食最正。
鹽爆雙脆$58
雙脆即豬肚仁（豬肚尖）和雞肫，只加入油、鹽、芫荽、蒜片一併炒熟，看似簡單，但是一道講求刀章及火候的菜式，豬肚仁和雞肫切成如菊花花瓣般細密，雙脆炒到過火會老變韌；兩者入口「索索」聲，菜如其名夠爽脆，最重要是沒有內臟的臭腥味。
鹽爆管廷$60
煮法與鹽爆雙脆相同，材料則換上管廷，即豬的喉管；切到好似蜈蚣的豬喉管，本身是淡味的食物，只以油鹽爆熟，不及濃香醬料烹煮的菜式惹味，食味單調只得爽口，難得是坊間少有老派京菜。
京燒羊肉$68
取羊腩部份，先蒸後炸，裏層嫩嫩滑滑帶點脂，外皮既酥且香，有陣羊羶味，怕羶的未必受得起，但吃羊唔羶又點會吃出真正羊味？怕羶者無謂嘥料，Order另一道菜啦！
叉子燒餅$12/2個（後）
炒肉末四季豆$58（前）
鍾意吃肉末榨菜，奈何榨菜偏鹹一件起兩件止。推介這款肉末四季豆，榨菜換了切粒四季豆，香口依舊但勝在唔太鹹，忍唔住連吞3件。
燒肥腸$58
同街邊檔$8一串炸大腸有乜分別？單看橫切面已覺肉厚好肥美，唔似街邊檔得層脆皮，外皮同樣脆但更有嚼頭。記得蘸點有蒜粒和甜麵醬的「老虎醬」，甜甜哋有陣陣蒜香。
豐澤園（23693435）
地址：尖沙嘴加連威老道94號尖東廣場2樓
營業時間：11:00am?2:00mn
座位：200個
備註：於晚市惠顧滿$300，或點選全日供應的4款4?0位用套餐（$438?1,380），均送烤北京填鴨一隻，優惠至9月30日。
